Day 9
早餐同前兩日差唔多, 我都無再影相啦..
食食下團友 S 一家人都落左黎, 坐左過黎一齊食早餐
佢地一家人今日食完早餐後, 會有幾個鐘自由時間,
之後就會落倫敦停留幾日探親.
而我地 12 天團0既團友就會出發去比利時!
食到咁上下, 領隊叫我地返房拎行李落黎 Check out 啦..
S 媽媽企起身同我擁抱, 我亦都祝福佢地之後旅程順利!
大家仲話唔知會唔會0係英國再遇到呢..
S 媽媽放開我之後, 叫我都同佢個仔擁抱下!
(Auntie 咁大整蠱)
我只係呆呆咁同團友 S 揮手講 bye-bye 就上樓啦..
當我拎行李出房間果陣, 團友 S 一家食完早餐上黎..
團友 S 見到我就張開雙手行過黎,
我都踏前幾步同佢黎左一個擁抱!
咁就同佢地一家道別啦!
佢地一家其實係定居外國, 今次分開真係冇咩機會再見
經過多日相處, 真係唔捨得!!!
旅程繼續
由巴黎去比利時0既布魯塞爾大約要四個鐘..
因為平時 S 爸爸媽媽就坐我後面而 S 就係斜後面.
我好多時擰轉後面同佢地傾計, 笑等等..
但果程車當我擰去後面, 已經空無一人...
忍唔住望住窗邊喊...
中途停左一個幾大0既休息站
又見到 macaron, 忍唔住買左一個大0既!
不過我第二日先食, 外層唔係好鬆脆..
呢 d 女仔係吉卜賽人, 佢地會趁紅燈果陣幫 d 車清潔,
然後問司機拎錢..
我見到個司機已經又擰頭又擰手, 個女仔都繼續抹,
當然之後冇比錢啦!
個女仔扁扁咀又抹過第二架車..
閒日都咁多人坐0係街飲咖啡, 比利時人真係悠閒!
不過多數都係男人喎!
究竟呢兩個係一男一女定係兩個男定係兩個女呢..
真係一個謎!
當地同性戀係合法0既!
而彩虹旗就係代表專係做男同性戀者生意0既!
去食 lunch 先!
又係食中餐, 今次好好味喎!! 個魚好滑!!
好多比利時啤酒, 好想買! 不過我怕爆樽~
我好鐘意飲 Hoegaarden 架~ 影低先!
呢支係玫瑰味!
呢 d 係手織掛畫!! 唔記得左係邊度..
領隊話係大美人同大劉生去過果度旅行架喎!
(八卦新聞都有得聽, 呢個領隊真係 100分)
呢間窩夫超好味! 但好大塊我又食到好飽所以無買,
領隊見我無食就分左大大塊比我!!
都話一個人去旅行都可以好幸福啦!
好多朱古力!
呢個就係小英雄啦!
網上資料 :
傳說古代西班牙入侵者在撤離布魯塞爾時，
欲用炸藥炸毀城市。
幸虧小男孩夜出撒尿，澆滅了導火線。
為紀念小英雄，人們雕刻一尊塑像。
這尊雕像被稱作“撒尿小童”，大名叫“布魯塞爾第一公民”像。
最早的撒尿小童，是石雕的，年久風化，不能持久。
現在的銅像建於1619年，是布魯塞爾冶金匠布列克
按照雕刻家杜奇士奈的石雕像鑄成的。
凡到過布魯塞爾的外國人，都要一睹這位“撒尿小童”的風采。
佢有好多套衫架, 差唔多每日都唔同!
大部份都係各國元首又或者富商送比佢0既!
之後我地就行去布魯塞爾0既市中心廣場
黎到比利時, 領隊帶我地去買 Godiva 朱古力!
相信佢係有佣分0既..
是但啦! 又真係平幾多0既!
領隊仲塞左差唔多十粒朱古力比我!!
咁我就不負佢所望咁買左 d 啦...
0係門口賣下廣告先!
買完朱古力我地就離開比利時啦...
由比利時去荷蘭大約 3 個鐘車程, 途中遇上塞車..
我地送船尾, 坐唔到觀光船啦~~ (好彩第二日有得坐返)
領隊帶我地去紅燈區參觀下!
玻璃門入面係會企住 d 只著內衣褲,
三點式又或者超短裙0既性工作者, 企0係入面招攬人客...
如果拉左窗簾即係0係入面做緊生意~
0係荷蘭, 呢種行為係合法0既, 不過唔可以用相機影佢地!!
呢張相我係網上搵0既..
唔同國籍唔同膚色唔同身材0既女仔都有..
但唔見有男仔喎...
紅燈區由好多條街組成, 兩邊都有櫥窗, 企滿女仔,
而且充斥住大麻0既味道,
其實氣氛都幾奇怪..
荷蘭吸大麻係合法, 原來佢地仲興吸毒菇!!
就係將 d 有毒0既菇燒著, 然後吸產生0既毒煙!!
仲有避孕套專門店, 真係大開眼界~
行返出大街..
去食晚餐~ 唔係好記得間餐廳個名添!! 呢間野好好味!
食完返酒店~~
有兩公婆團友過黎我房幫手食杯麵同飲我 d 菊花茶 !!!
~ day 9 完 ~
沒有留言:
張貼留言